تجربتى مع اكتئاب ما بعد الولادة

تجربتى مع اكتئاب ما بعد الولادة

تجربتى في اكتئاب مابعد الولادة 

كانت تجربة عنيفة وصعبة جدا ومدة كانت طويلة نوعا ما، استمرت سنه ونصف عانيت من اعراض متعددة وكانت مرحلة قاسية لكن مرت الحمد لله ودى خلاصة تجربتى اقدمها لكل الامهات علشان تتعلمي من اخطائى وان شاء الله تمر بهدوء وسلام : 

 الاعراض اللى حسيت بها بعد الولادة مباشرة :_

١_ حالة هلع شديدة وخوف شديد بدون مبرر .

٢_ احساس قوي مبالغ فية بالألم والبكاء المستمر بلا سبب .

٣_ الخوف من الاقتراب من الطفل الرضيع لسبب غير مفهوم لكن في نفس الوقت خائفة عليه جدا  

٤_ وساوس وافكار متلاحقة ومستمرة ومزعجة ومشوشة غير واضحة .

٥_ضربات قلب سريعة ودوخة وخنقة وقلق وتوتر وغضب مستمر  .

٦_ الاحساس باليأس والاحباط بدون داعي .

٧_ فقدان الشهية  وفقدان الرغبة في الحياة .

٨_ تحولت الاعراض بسرعة لاكتئاب مزمن اصبح مجرد النهوض من السرير والقيام بالمهام الروتينية اليومية مهمة ثقيلة جدا واهملت صحتى وكانت نتائج ذلك سيئة حتى بعد انتهاء الاكتئاب .

٩_ضعف التركيز والنسيان وصعوبة النوم او العكس النوم باستمرار ولاوقات طويلة .

خلاصة التجربة 

١_ استشارة الطبيب المدرك لطبيعة الحالة مهمة وايضا الدعم والتفهم والمساعدة من الاسرة مهم جدا في تخطى الحالة او على الاقل تقصير مدتها 

٢- لازم تكونى مدركة ان كل التغييرات والافكار والحالة اللى بتحصل لك هي مرض مالكيش يد فية ، متلوميش نفسك انتى مش ام سيئه بالعكس انتى تتحملى ماهو اكثر واشد من الالم البدنى   .

٣_ادراك انها فترة مؤقتة وهتعدي مهما طالت وان سيدات كتيير بيمروا بيها وبيعدوا منها انت مش لوحدك ، وكمان لازم تعرفي ان كل المخاوف والافكار اللى بتدور في دماغنا دى اوهام ومش حقيقة دا خلل في كيمياء المخ نتيجة الهرمونات ومالناش اي ذنب فية .

٤_ حاولى تحافظى على روتين ثابت برغم صعوبة الامر يتمثل في الآتي :-

 _ غسل الوجة والاسنان والعناية بالنظافة الشخصية والغذاء الصحى يوميا ؛لانى عانيت من مشاكل صحية عديدة نتيجة فقدان الشهية ومشاكل في الجلد والاسنان لانى كنت امر باكتئاب حاد .

_ شوفى الشمس كل يوم ولو من البلكونة او الشباك .

_ حاولى تخرجي وتتمشي ولو لآخر الشارع ، بصي للشجر وللسما واستنشقى الهواء .

_ متفكريش في اي شيء سلبى وانسي التفاصيل المزعجة ، فكرى فقط في المستقبل وطفلك لما يكبر ويصبح شاب ، فكرى دايما افكار حلوة وايجابيه .

_ اشغلى وقتك على قد ماتقدرى ولا تجلسي لوحدك ، ادعي ربنا دايما ربنا قنا واصرف عنا شر ماقضيت ادعى بكل مخاوفك وربنا موجود .

_ولو حسيتى انك عاوزة تأذي نفسك او طفلك اطلبى المساعدة من اقرب حد فورا .

_ في النهاية 

اكتئاب مابعد الولادة تجربة صعبة لكن لا تقلقى فالاكتئاب درجات ممكن يكون بسيط ويومين وينتهى او متوسط او حاد ومزمن ، اعراضه ومدته وعلاجة بتختلف ، علشان كدا استشارة الطبيب الفاهم للحالة مهمة وبتختصر الطريق .

ادراكك لطبيعة الحالة والأعراض واداركك انها مؤقتة وهتنتهى بإذن الله وارادتك القوية هتساعدك في تخطيها وهتخرجى من التجربة انسانه تانية قوية جدا ومحبة لنفسها وللحياة وبتقدر قيمة كل شيء حولها .