زمان

 زمان كان كل شئ مستقل بذاته بس كان كل شئ ليه فرحته و متعته و جماله و كان كل شئ بيجمع الناس و بيقربهم من بعض

زمان عايز تشوف فيلم لازم يكون عندك تليفزيون وعندك جهاز اسمه فيديو و تنزل تروح لمحل تأجير حاجه اسمها شرائط فيديو و تختار الفيلم إلى عايز تشوفه و تأجر الفيلم لمده يوم  وبعد كده ترجع البيت تشوف الفيلم انت وعائلتك الموضوع  كان فيه شويه صعوبه بس كان فيه لمه العائله و متعه مشاهده الأفلام كأنك فى السينما اما اليوم كل واحد مع نفسه ماسك موبايله و بيشوف أفلامه مع نفسه لوحده .

زمان عايز تسمع اغانى لازم يكون عندك جهاز اسمه كاسيت و تنزل تروح تشترى حاجه اسمها شرائط كاسيت و كان الشريط الأصلى غالى كنت تشترى الشريط المنسوخ ب 2.5 او 3.5 وتختار الشريط إلى عايز تسمعه وترجع البيت تسمع اغانى الشريط انت و عائلتك و الصوت بيكون عالى كان بيسمع الجيران . الموضوع مكنش سهل بس كان فيه فرحه و متعه الاستماع كأنك فى قاعه افراح اما اليوم كل واحد مع نفسه حاطط السماعات على أذنه و بيسمع أغانيه مع نفسه لوحده .

زمان عايز تسجل اللحظات الحلوه لازم يكون عندك جهاز اسمه كاميرا و تنزل تروح تشترى حاجه اسمها فيلم كاميرا و تصور بالكاميرا كل اللحظات الجميله افراح ، رحلات ،مناسبات مع العائله و الاصدقاء و كنا نفرح لما فيلم الكاميرا يكون فيه صورتين زياده و نزعل لما الفيلم يحترق يعنى الصور إلى عليه تتمسح و كان فى تعاون بين العائلات كنا نسلف الكاميرا لبعض أما اليوم كل واحد ماسك الموبايل و بيصور نفسه لوحده .

الفرق بين زمان و اليوم هو أن زمان كانت كل حاجه مستقله بنفسها بس كل حاجه كان ليها فرحه و لمه كل حاجه كانت بتقربنا من بعض كل حاجه كان ليها بهجه اليوم كل حاجه متاحه بس الناس أصبحنا فى جزر منعزله كل واحد مع نفسه لوحده .